ОРАЛ. ҚазАқпарат - Түркияда Оралдың «Ақжайығы» Румыния біріншілігінің жоғары лигасында өнер көрсететін «Волунтари» клубын ойсырата ұтты, деп хабарлайды «ҚазАқпарат» тілшісі.
«Ақжайық» футбол клубының баспасөз қызметінен түскен мәліметке қарағанда, жолдастық матчта есепті Оралдың өз түлегі Еркін Тапалов ашты. Содан кейін командаға жуырда ғана алынған украиналық шабуылшы Эсеола Адеринсола қос голдың авторы атанды. Екінші таймда «Ақжайықта» сыннан өтіп жүрген Игорь Вузачич ойын нүктесін қойды.
Бұған дейін «Ақжайық» жолдастық кездесулерде ресейлік «Амкар» (Пермь) және «Кубань» (Краснодар) командаларын 1:0 есебімен ұтқан болатын.
Айта кетейік, украиналық маман Владимир Мазяр жаттықтыратын оралдық клуб Түркиядағы бірінші оқу-жаттығу жиынын 28 қаңтарда аяқтайды. Содан кейін Оралға оралып, 4 ақпанда сол елде өтетін екінші жиынға аттанады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).