ОРАЛ. ҚазАқпарат – Премьер-лигада өнер көрсететін «Ақжайыққа» жаңадан екі украиналық ойыншы алынды, деп хабарлайды ҚазАқпарат тілшісі.
«Ақжайық» футбол клубының директоры Азамат Шайхының айтуынша, қорғаушы Артем Барановский мен шабуылшы Микола Ковталюкпен келісімшартқа қол қойылды.
Тәжірибелі А.Барановский 30 жаста. Оған Қазақстан премьер-лигасы да таңсық емес, қорғаушы бұған дейін «Шахтер» (Қарағанды), «Қызылжар» (Петропавл) командаларының намысын қорғады.
Ал 25 жастағы М.Ковталюк осы кезге дейін Украина, Грузия клубтарында ойнаған. Соның ішінде «Динамо» (Тбилиси) құрамында Грузияның күміс жүлдегері атанған.
«Команда осымен толық жасақталды. Қазір Оралдамыз. 14 наурыз күні Қостанайдың «Тобылымен» сырт алаңда өтетін алғашқы ойынға дайындалу үстіндеміз», деді ҚазАқпарат тілшісіне А.Шайхы.
Еске сала кетейік, бұдан бұрын «Қайратта» доп тепкен екі ойыншының «Ақжайыққа» алынғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).