Футболдан УЕФА Конференция лигасы алтыншы турындағы қазақстандық «Астана» командасының сырт алаңдағы «Виктория Пльзень» (Чехия) клубымен кездесуінде франциялық төрешілер бригадасы қызмет атқарады, деп хабарлайды Kazinform.
Бас төреші - Вилли Делажо. Оған отандастары Эрван Финжан мен Филипп Жанн көмекшілік жасайды. Қосалқы төреші де франциялық Томас Леонард.
Кездесу 14 желтоқсаннан 15-не қараған түні елорда уақытымен 02:00-де басталып, «Qazsport» телеарнасынан тікелей эфирде көрсетіледі.
«Астана» командасы C тобында ойын көрсетеді. Бесінші турдан кейін «Виктория Пльзень» (Чехия) - 15, «Динамо Загреб» (Хорватия) - 6 ұпай жинаса, «Балкани» (Косово) мен «Астанада» - 4 ұпайдан бар.
Қазірге дейін астаналық клуб екі мәрте «Динамо Загребке» 1:5, 0:2, өз алаңында «Виктория Пльзеньге» 1:2 есебімен жеңілді. Сондай-ақ, «Балканиді» сырт алаңда 2:1 есебімен тізе бүктірсе, өз алаңында 0:0 есебімен тең ойнады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.