НҰР-СҰЛТАН. ҚазАқпарат - «Атырау» командасына жаңа бас бапкер келді. Енді аталмыш қызметті беларусьтік Олег Дулуб атқаратын болды, деп хабарлайды ҚазАқпарат тілшісі.
Олег Дулуб 1965 жылы дүниеге келген. 1983-2001 жылдар аралығында футбол ойнап, Беларусь, Польша, Ресей, Чехия, Латвия, Қытай, Финляндия елдерінің біріншілігінде доп тепті. 2001 жылдан бері бапкерлікпен айналысады. Бүгінгі күнге дейін Беларусьтің «Минск», «Гомель», «Динамо», «Крумкачы», БАТЭ, украиналық «Карпаты» және «Черноморец» командаларына жетекшілік жасады. 2012-2014 жылдарда өзі бапкерлік жасаған командалармен Еуропа лигасы ойындарына қатысты. Соңғы атқарған қызметі - Беларусьтің 19 жасқа дейінгі жасөспірімдер құрамасы.
Естеріңізге сала кетелік, 27 сәуір күні «Атырау» командасының бас бапкері қызметін атқарған ресейлік маман Виктор Кумыков орнын босатты.
Аталмыш команда қазір 10 ойыннан кейін небәрі бес ұпай жинап, турнир кестесінде 11-орында келеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.