Футбол: Бас жүлде тағдыры алдағы үш турда шешіледі

Футболдан Премьер-лига командалары арасындағы Қазақстан біріншілігінің кейінге қалдырылған 15 және 18-тур ойындары өткізілді, деп хабарлайды ҚазАқпарат тілшісі.

"Қызылжар» (Петропавл) мен «Тобыл» (Қостанай) командалары 15-турдың кейінге қалдырылған ойынында 1:1 есебіне қанағат білдірді.

Ал елордалық «Астана» өз алаңында Көкшетаудың «Оқжетпесін» 5:2 есебімен қапы қалдырды.
Сондай-ақ, Шымкенттің «Ордабасы» клубы өз алаңында Түркістан облысының «Мақтаралын» 1:0 есебімен сүріндірді.

Қазір турнир кестесінде «Ордабасы» 52, «Астана» 49 ұпай жинап, бір-бірімен қатарлас тұр. Бас жүлде тағдыры осы екі команда арасында алдағы үш турда шешілуі мүмкін.

Енді 24-тур ойындары 30 қыркүйек пен 1 қазан аралығында өткізіледі.

Еске салсақ, бұдан бұрын Қазақстан құрамасы Дания және Финляндиямен ойнайтын футболшылар тізімін жариялады.