ОРАЛ. ҚазАқпарат - Бірінші лига командалары арасында футболдан ел чемпионатының кезекті турында Оралдың «Ақжайығы» кеше өз алаңында Шымкенттің «Қыранын» қабылдады.
Кездесу барынша тартысты болғанымен, есеп ашылмай, тең аяқталды. Бұл осыған дейін көш бастап келе жатқан «Қыран» үшін де, премьер-лигаға берілер жолдамадан үмітін үзбеген «Ақжайық» үшін де қолайлы болған жоқ. Мұны басқа командалар сәтті пайдалана білді. Өз алаңында «Екібастұзды» 5:2 есебімен ойсырата ұтқан Көкшенің «Оқжетпесі» 40 ұпаймен бірінші орынға көтерілді. «Қыран» 39 ұпаймен екінші сатыда қалса, сырт алаңда «Қызылжарды» 2:1 есебімен тізе бүктірген Ақтаудың «Каспийінің» одан бір ғана ұпайы кем. «Ақжайық» 29 ұпаймен жетінші орында ғана келеді. Оның үстіне омыртқасында кінәраты бар шабуылшы Николай Забродин қатардан шығып қалды. Қорғаушы Мейрам Сапанов пен Ақтөбеден келген шабуылшы Сергей Лисенков та жарақатына байланысты әзірге командаға көмектесе алмайды.
Оралдықтар келесі кездесуін 30 тамыз күні көш соңындағы «Мақтааралмен» сырт алаңда өткізеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).