АСТАНА. KAZINFORM – 29 қаңтардан 30-ына қараған түні Чемпиондар лигасы жалпы кезеңінің 8-турында 18 матчта 64 гол соғылды.
Championat.com сайтынан алынған мәліметке қарағанда, бұл – XXI ғасырдағы ең үздік көрсеткіш.
Ал жалпы турнир тарихында ол екінші нәтиже болып есептеледі. Бұдан бұрын 1970 жылы 16 қыркүйекте 1970-1971 жылғы Еуропа чемпиондары кубогының бірінші кезеңінде 16 кездесуде 66 гол соғылған еді.
Чемпиондар лигасының жалпы кезеңінде 8 ойында 21 ұпай жинаған ағылшындық «Ливерпуль» клубы үздік шықты. Испаниялық «Барселона» 19 ұпаймен екінші орынға ие болса, лондондық «Арсенал» (19 ұпай) үздік үштікті түйіндеді.
Алғашқы сегіздікке енген командалар 1/8 финалға бірден жолдама алды. 9-24 орын алған клубтар қалған сегіз жолдаманы сарапқа салады.
Еске сала кетейік, бұдан бұрын Еуропа лигасында Зайнутдинов ойнайтын «Бешикташ» командасы ірі есеппен жеңіске жеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).