АЛМАТЫ. KAZINFORM – Әйелдер арасында 2025 жылғы Еуропа чемпионатының іріктеу кезеңінде Қазақстан құрамасы Орталық стадионда Арменияны ойсырата жеңді.
Бұған дейін сырт алаңда армениялықтарға 1:2 есебімен есе жіберген қазақстандықтар артығымен қарымта қайырды.
Алдымен 28-минутта Камила Құлмағамбетованың бұрыштамадан берген пасынан кейін Александра Бурова есеп ашты. 35-минутта Аида Гайстенова үш ойыншыны қапы қалдырып, тоғыздықты дәл көздеді – 2:0. 39-минутта Армения сапындағы Марал Артин есепті қысқартты.
Екінші таймда 57-минутта тағы да бұрыштамадан кейін команда капитаны Бибігүл Нұрышева баспен дәл соқты. Бір минуттан соң Әселхан Тұрлыбекова ойын нүктесін қойды - 4:1.
Бұдан кейін де қазақстандықтардың гол соғатын мүмкіндіктері болды.
Осылайша, Қазақстан әйелдер құрамасы алғашқы жеңісіне қол жеткізді. Бұған дейін Мадияр Кембіловтің шәкірттері өз алаңында Болгариядан – 0:1, сыртта Румыниядан – 0:1, Армениядан 1:2 есебімен ұтылып қалған еді.
Қазақстан келесі кездесуін 12 шілдеде өз алаңында Румыниямен өткізеді. Содан соң 16 шілдеде Болгариядағы матч күтіп тұр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).