НҰР-СҰЛТАН. ҚазАқпарат - Бүгін 21 жасқа дейінгі жастар арасында 2021 жылғы Еуропа чемпионатына іріктеу сатысында Қазақстан футболшылары өз алаңында Фарер аралдарын қабылдады, деп хабарлайды ҚазАқпарат тілшісі.
Бұл екі құраманың да іріктеу кезеңіндегі соңғы ойыны болатын. Ойын барысында фарерлік футболшылар белсенді қимыл көрсетті.
Кездесудің 26-минутында олардың қатарынан Стефан Радосавлевич есеп ашты. Ал 50-минутта Петур Кнудсен есепті ұлғайтса, Йонн Йоханнессен 64-минутта мергендігімен көзге түсті.
Есеп 0:3. Фарерлік футболшылар осылайша белсенділігін арттыра түсті.
Осыдан кейін ғана қазақстандық жастар қарқынын үдетті. Ойынның 65-минутында Рамазан Каримов гол соқса, 81-минутта Оралхан Өміртаев пенальтиден есеп айырмасын қысқартты.
Ойында фарерлік футболшылар 3:2 есебімен жеңіске жетті. Жеңілісіне қарамастан Қазақстан жастары алтыншы топта төртінші орынды сақтап қалды . Ал Фарер аралдары 9 ұпаймен бесінші орында тұр.
Сондай-ақ, бүгін аталған топта Солтүстік Македония мен Черногория, Испания мен Израиль құрамалары кездеседі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.