ОРАЛ. ҚазАқпарат – Литва құрамасының жартылай қорғаушысы Симонас Урбис Оралдың «Ақжайығына» алынды, деп хабарлайды ҚазАқпарат тілшісі.
«Ақжайық» футбол клубының баспасөз қызметі мәлім еткеніндей, ойыншымен келісімшартқа қол қойылды.
Осыған дейін 26 жастағы жартылай қорғаушы өз елінде «Банга», «Экранас», «Атлантас», «Паланга», «Жальгирис» және «Кауно Жальгирис» командаларында доп тепті. Литва ұлттық құрамасының сапында да ойнады.
Өткен жылы «Банга» құрамында 34 матчта 11 гол соғып, 4 нәтижелі пас берді.
Қазіргі кезде Түркияда оқу-жаттығу жиынын өткізіп жатқан «Ақжайық» «Напредак» (Сербия) клубымен бақылау ойынында 0:1 есебімен қарсыласына жол берді.
Команда құрамында басқа да футболшылар қаралымнан өтуде.
Өткен жылғы маусымда оралдық клуб премьер-лигада 9-орыннан көрінген еді.
Еске сала кетейік, бұдан бұрын «Ақжайық» футбол клубы бас бапкерінің тағы бір маусымға қалатын болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).