ОРАЛ. ҚазАқпарат - Футболдан Қазақстан чемпионатының премьер-лигасында өнер көрсететін Оралдың «Ақжайығы» шетелдегі алғашқы оқу-жаттығу жиынын 8 қаңтардан бастап Анталья қаласында өткізбек, деп хабарлайды «ҚазАқпарат» тілшісі.
«Ақжайық» футбол клубының баспасөз хатшысы Арсен Ғұбашевтің айтуынша, бас бапкер Вахид Масудов бастап баратын командада әзірге ешкіммен келісімшартқа қол қойылған жоқ.
«Ақжайықтан» ресми түрде қорғаушы Рақымжан Розыбақиев қана кетті, ол «Ақтөбе» клубына ауысты. Негізінен былтырғы құрам және жаңадан шақырылған ойыншылар Антальяда бас қосады. Жиырма күнге созылып, 28 қаңтар күні аяқталатын жиын барысында команда құрамы анықталады. Бас бапкер мәселесі де сонда шешіледі. Бәрі, әрине, қаржыға байланысты», - деді «ҚазАқпарат» тілшісіне Арсен Ғұбашев.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).