ОРАЛ. ҚазАқпарат – Футболдан Қазақстан чемпионатының төртінші турында «Ақжайық» Петропавлдың «Қызылжарын» қабылдады, деп хабарлайды ҚазАқпарат тілшісі.
Бірінші таймда қос команда барынша шабуылдап көргенімен, есеп ашылған жоқ.
Екінші тайм басында қонақтардан черногориялық жартылай қорғаушы Дарко Зорич тепкен допты «Ақжайықтың» қақпашысы, украиналық Сергей Литовченко қайтарғанымен, ол оралдық Эльдар Абдрахмановқа тиіп, қақпаға кіріп кетті.
Бұдан кейін «Қызылжар» ойыншылары негізінен қорғанысқа көшті.
«Ақжайық» жаңадан футболшылар қосып, күш салғанымен, ештеңе өзгермеді.
84-минутта «Қызылжар» сапындағы бразилиялық шабуылшы Алвес Данило Алмейда дөрекі ойнап, алаңнан қуылды.
Осылайша автогол матч тағдырын шешіп, қонақтар 1:0 есебімен жеңіске жетті.
Оралдықтар келесі кездесуін 13 сәуір күні сырт алаңда «Шахтермен» өткізеді. Биыл сүреңсіз ойнап жүрген қарағандылықтар бүгін «Тараздан» 0:4 есебімен жеңіліп қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).