ОРАЛ. ҚазАқпарат - Премьер-лигаға қайта оралуды мақсат етіп отырған «Ақжайық» командасы 24 жасар қорғаушы Ерболат Рүстемовпен келісімшартқа отырды, деп хабарлайды ҚазАқпарат тілшісі.
«Ақжайық» футбол клубының баспасөз қызметінен түскен мәліметке қарағанда, оралдықтарға Қызылорданың «Байқоңыр» командасынан келіп қосылған Е.Рүстемов спорттық жолын 2014 жылы «Қайсардың» екінші құрамында бастады.
Кейін клуб басшылығы Ерболатты «Байқоңырға» ауыстырған. Соңғы төрт маусымды «Байқоңыр» сапында өткізген қорғаушы 89 ойында 13 голдың авторы атанды.
Түркиядағы алғашқы оқу-жаттығу жиынын аяқтаған «Ақжайықтың» бас бапкері, украиналық маман Сергей Зайцевтің айтуынша, қазіргі кезде команда құрамы 60 пайызға жасақталды. Әлі де жаңа футболшылар қаралымға келіп, сыннан өтетін болады. Ең бастысы, жастар оқу-жаттығу жиынында тер төгумен бірге басқа командалармен кездесіп, шеберліктерін шыңдауға мүмкіндік алды. Алдағы жиында одан да мықты клубтармен ойнау жоспарланған. Сол кезде құрамды нақтылап, чемпионатқа тас-түйін дайындықпен келу көзделуде.
Еске сала кетейік, бұдан бұрын «Ақжайықтың» үш ойыншымен келісімшартты ұзартқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).