АСТАНА. KAZINFORM — Футболдан Қазақстан чемпионатының төртінші турында «Ордабасы» (Шымкент) — «Атырау» матчына қазылық еткен Санжар Ысқақов пен Татьяна Сорокопудоваға қатысты шешім қабылданды.
Қазақстан футбол федерациясынан мәлім еткеніндей, аталған төрешілер ұлттық жарыстар аясындағы матчтарда қызмет көрсетуден уақытша шеттетілді.
— Бұл шешім Қазақстан Премьер-лигасының соңғы турында жіберілген бірқатар өрескел әрі маңызды қателіктерге байланысты қабылданды. Аталған қателіктер матч нәтижесіне әсер етті. Олардың алдағы мәртебесіне қатысты түпкілікті шешім ҚФФ-ның құзыретті органдары тарапынан жан-жақты тексеріс жүргізілгеннен кейін қабылданады, — делінген ресми ақпаратта.
«Ордабасы» — «Атырау» матчында 82-минутта атыраулықтар соққан екінші голды бас төреші Санжар Ысқақов VAR-ды қарағаннан кейін есептемей қойған еді. Егер есептелген жағдайда «Атырау» 2:0 есебімен алға шығатын еді. Оған қоса 97-минутта төреші атыраулықтар қақпасына пенальти белгілеп, шымкенттіктер есепті теңестіріп кетті. Бұл шешімнің де қате болғаны кейін мойындалды.
Еске сала кетейік, бұдан бұрын «Қайраттың» «Астананы» ірі есеппен жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).