НҰР-СҰЛТАН. ҚазАқпарат - Бүгін футболдан Премьер-лига командалары арасындағы ел біріншілігі үшінші турының тағы бір кездесуі аяқталды, деп хабарлайды ҚазАқпарат тілшісі.
Биыл еліміздің атынан еурокубок ойындарында бақ сынайтын Қарағандының «Шахтері» аталған турда екінші мәрте жеңілістің ащы дәмін татты. Бұл жолы қарағандылық ұжым Петропавлда «Қызылжар» командасына 0:2 есебімен есе жіберді. Кездесу барысында алаң иелері қатарынан Дарко Зорич 16, Шота Григалашвили 40-минуттарда мергендігімен көзге түсті.
Бүгін тағы екі ойынның бірінші кезеңі аяқталды. Бірінші кезеңнен кейін өз алаңында Алматының «Қайраты» «Тараздан» 0:2 есебімен жеңіліп жатыр. «Тараз» сапынан Педро Эуженио 9, Бауыржан Байтана 35-минутта гол соқты.
Бірінші кезеңнен Шымкентте жергілікті «Ордабасы» Оралдың «Ақжайығымен» 0:0 есебімен тең түсуде.
Сондай-ақ, бүгін Қостанайда «Тобыл» мен елордалық «Астана» шеберлік байқасады.
Естеріңізге сала кетелік, 4 қыркүйекте аталған турдағы үшінші ойын өткізілді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.