ТАЛДЫҚОРҒАН. ҚазАқпарат - Футболдан ел біріншілігінің кезекті турында Талдықорғанның «Жетісу» командасы өз алаңында «Ақжайықты» қабылдады, деп хабарлайды ҚазАқпарат тілшісі.
Ойын барысында қос команда алма-кезек шабуылдауға тырысып бақты. Дегенмен алаң иелері бірінші болып есеп ашты. 33-минутта Рауль Джалилов әбжілдік танытып, «Жетісу» клубын алға шығарды.
Екінші таймда оралдықтар да барын салды. 70-минутта Латвия ұлттық құрамасының ойыншысы Артур Карашаускс айып алаңында өз шеберлігін көрсетіп, таразы басын теңестірді.. Бұл оның «Ақжайық» сапындағы алғашқы голы еді.
Осылайша оралдықтар екінші матч қатарынан 1:1 есебімен тең ойнады. Украиналық маман Сергей Зайцевтің шәкірттері 25 ұпаймен әзірше алтыншы орынға көтерілді.
Бүгін сондай-ақ «Атырау» мен «Қайсар», «Ақтөбе» мен «Астана» командалары өзара кездесуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).