НҰР-СҰЛТАН. ҚазАқпарат - Футболдан 2022 жылғы әлем чемпионатына іріктеу сатысында Қазақстан сынға түсетін D тобындағы тағы бір кездесу аяқталды, деп хабарлайды ҚазАқпарат тілшісі.
Аталған ойында Украина мен Франция құрамалары шеберлік байқасты.
Екі құрама топтағы бірінші орынға негізгі үміткерлер қатарында саналады. Сондықтан кездесу барысында екеуі де жеңіске жету мүмкіндігін іздеді.
Ойынның 44-минутында украиналық Николай Шапаренко есеп ашқан болатын. Екінші кезеңнің 50-минутында франциялық құрамадан Антони Марсьяль таразы басын теңестірді.
Кездесуде екі құрама 1:1 есебіне қанағат білдірді.
Еске салсақ, Қазақстан сырт алаңда Францияға 0:1 есебімен жол бергген еді.
Одан бұрын қазақстандық құрама өз алаңында Франциядан 0:2 есебімен жеңілсе, одан кейін сырт алаңда Украинамен 1:1 есебімен тең түсті. Үшінші кездесуінде өз алаңында Украинамен 2:2 есебімен тең ойнады.
Енді 7 қыркүйекте Қазақстан сырт алаңда Босния және Герцоговинамен кездессе, Франция өз алаңында Финляндиямен жасыл алаңға шығады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.