АСТАНА. ҚазАқпарат – Қатарда футболдан өтіп жатқан әлем чемпионатында Польша құрамасының қақпашысы Войцех Щенсны сейв жасау жөнінен көш бастады, деп хабарлайды ҚазАқпарат тілшісі.
Поляк қақпашысы С тобында өткен екі матчта қақпасына доп өткізбей, сейв санын 9-ға жеткізді.
Бүгін Сауд Арабиясымен өткен матчта В.Щенсны өз қақпасын бес рет аман алып қалды. Соның ішінде Салем Аль-Давсаридің 11 метрлік айып добын қайтарды.
Бұдан бұрын Мексикамен өткен бірінші ойында В.Щенсны төрт рет соққыны қақпаға дарытпады.
В.Щенсныдың Италия чемпионатында «Ювентус» (Турин) клубының қақпасын қорғайтыны мәлім.
Польша – Сауд Арабиясы матчында тағы бір тарихи дерек тіркелді. Польша құрамасының сұрмергені Роберт Левандовски әлем чемпионатының финалдық кезеңіндегі алғашқы голын соқты.
Еске сала кетейік, бұдан бұрын футболдан әлем чемпионатында Иранның соңғы минуттарда Уэльсті жеңіп кеткенін жазған болатынбыз.
Сондай-ақ Нидерланд пен Эквадор құрамалары тең тарқасса, Аустралия Тунисті тізе бүктірді.
Польша құрамасы Сауд Арабиясынан басым түсті.
Фото: Сафонов Александр/championat.com
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).