АСТАНА. ҚазАқпарат – Футболдан бірінші лига командалары арасында ел чемпионатының 20-турында Семейдің «Елімайы» «Түркістанды» жеңіп, турнир кестесіндегі жағдайын жақсарта түсті, деп хабарлайды ҚазАқпарат тілшісі.
Семейлік клуб биыл Премьер-лигаға оралуды алдына мақсат етіп отыр. Әрбір турда қарсыластарын қапы қалдырып, үш ұпайды еншілеп келеді.
Команда 20-турда сырт алаңда «Түркістанды» 2:1 есебімен сүріндірді. Нәтижесінде турнир кестесінде өкшелеп келе жатқан түркістандық «Тұранды» жеті ұпайға артқа қалдырып отыр.
Аталған турдағы өзге ойындарда 18 тамызда «Астана-2» «Қыранды» 2:1, «Қайрат-2» «Арысты» 5:1 есебімен тізе бүктірді.
Ал 17 тамызда «Тараз» «Хан тәңірін» 2:1, «Тұран» «Екібастұзды» 6:1 есебімен жеңсе, «Ақжайық» «Оңтүстік академиясына» 1:2, «Жас Қыран» «Жеңіске» 0:1 есебімен есе жіберді.
Енді 21-тур ойындары 24 және 25 тамыз күндері өткізіледі.
Еске салсақ, бұдан бұрын қазақстандық футболшы Бахтияр Зайнутдинов Түркияның «Бешикташ» клубына ауысты.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.