НҰР-СҰЛТАН. ҚазАқпарат - Футболдан бірінші лига командалары арасындағы Қазақстан біріншілігінің он үшінші туры мәресіне жетті, деп хабарлайды ҚазАқпарат тілшісі.
Көш басында келе жатқан Көкшетаудың «Оқжетпесі» бүгін сырт алаңда Павлодар облысының «Екібастұз» командасын 1:0 есебімен сүріндірді. Нәтижесінде турнир кестесінде 31 ұпаймен бірінші орнын сақтап қалды.
Одан кейінгі орындағы Шымкенттің «Қыраны» Алматыда «Қайрат-жастарды» 3:0 есебімен ойсырата жеңді. Аталған клуб 29 ұпаймен екінші орынға орнықты.
Сондай-ақ, Жамбыл облысының «Тараз-Қаратау» клубы сол өңірдің тағы бір өкілі «Игілікті» 1:0, елордалық «Жеңіс» қарағандылық «Шахтер-Болатты» 4:1, «Астана жастар» қызылордалық «Байқоңырды» 3:1, шымкенттік «Академия Оңтүстік» түркістандық «Яссыны» 3:2 есебімен жеңді.
Аталған турдағы тағы бір ойында 12 шілдеде Талдықорғанның «Жетісуы» қызылордалық «Қайсардан» 2:1 есебімен басым түскен еді.
Енді 14-тур ойындары 30, 31 шілде және 24 тамыз күндері өтеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.