АСТАНА. KAZINFORM - Футболдан бірінші лига командалары арасындағы Қазақстан біріншілігінің тоғызыншы турының алғашқы ойын күні өтті.
Көш басында келе жатқан Ақтаудың «Каспий» командасы бұл жолы да сүрінген жоқ. Сырт алаңда Шымкенттің «Қыранын» 3:0 есебімен тізе бүктірді.
Осылайша жетінші жеңісіне қол жеткізген «Каспий» турнир кестесінде қарсыластарынан ұзай түсті.
Оларды өкшелеп келе жатқан Түркістан облысының «Жетісайы» аталған турда сырт алаңда Павлодар облысының «Екібастұзына» 1:2 есебімен жол берді.
Өз алаңында «SD Family» өскемендік «Алтай» клубынан 1:2 есебімен жеңілсе, «Қайрат-2» «Tүркістаннан» 5:1 есебімен басым түсті.
Енді аталған турда 31 мамырда «Арыс» пен «Тараз», «Қайсар-2» мен «Ақжайық», «Оқжетпес» пен «Ұлытау», «Хан Тәңірі» мен «Ақтөбе-2» кездеседі.
Еске салсақ, бұдан бұрын футболдан Қазақстан кубогында «Тобыл» мен «Ақтөбе» жеңіске жетті.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.