Футболдан бірінші лигада «Оқжетпес» қайтадан көш басына шықты

АСТАНА. KAZINFORM - Футболдан Бірінші лиганың ХХVІІІ туры мәресіне жетті.

Аталған турда Көкшетаудың «Оқжетпесі» қайтадан көш басына шықты. Соңғы төрт турда олар екі мәрте жеңілістің ащы дәмін татып, турнир кестесіндегі жағдайын біршама қиындатып алған еді. Бұл жолы көкшетаулық команда «Түркістанды» 7:0 есебімен тізе бүктіріп, көш басына шықты.

Аталған командамен бірге бас жүлдеге негізгі үміткер саналатын Жезқазғанның «Ұлытауы» бұл жолы сырт алаңда Павлодар облысының «Екібастұзына» 3:4 есебімен есе жіберді.

Енді алда екі тур қалды. «Оқжетпес» енді 18 қазанда сырт алаңда «SD Family» клубымен кездессе, 25 қазанда биылғы маусымды өз алаңында Қызылорданың «Қайсар-2» командасы арасындағы ойынмен түйіндейді.

Ал «Ұлытау» 18 қазанда Оралда «Ақжайықпен» жасыл алаңға шықса, 25 қазанда өз алаңында «SD Family» клубымен ойнайды.

Сондай-ақ бас жүлдеден қазір екінші орында келе жатқан «Қайрат-2» командасы да қол үзе қойған жоқ. Алматылық клуб аталған турда Түркістан облысының «Арысын» 2:1 есебімен сүріндірді.

Бұл турда Түркістан облысының «Жетісайы» «Таразды» 2:0, Оралдың «Ақжайығы» «Ақтөбе-2» командасын 1:0, алматылық «Хан тәңірі» қызылордалық «Қайсар-2» командасын 4:1 есебімен жеңді.

Еске салсақ, бұдан бұрын Ұлттар лигасында Қазақстан құрамасы Австриядан ойсырай жеңілді.