НҰР-СҰЛТАН. ҚазАқпарат - Футболдан Премьер-лига командалары арасындағы Қазақстан біріншілігі тоғызыншы турында Алматының «Қайраты» Петропавлдың «Қызылжарымен» тең түсті, деп хабарлайды ҚазАқпарат тілшісі.
Алматы қаласында өткен ойында қос команда негізінен шабуылға иек артты. Десе де олар қолайлы сәттерді тиімді пайдалана алған жоқ.
Ойынның 7-минутында алматылық клубтан Рикардо Алвеш қызыл қағаз алып, алаңнан қуылды. Соған қарамастан олар қарсыласына лайықты төтеп берді.
«Қайрат» ойыншысы Сұлтанбек Астанов 45-минутта көздеген нысанадан мүлт кеткен жоқ. Оған 64-минутта «Қызылжар» командасынан Дарко Зорич бір голмен жауап қайырды.
Осылайша екі команда 1:1 есебіне қанағат білдірді. Алматылық клуб қатарынан төрт ойында қарсыластарын жеңе алмай келеді.
Еске салсақ, бүгін «Ақтөбе» «Ақжайықты» 2:1, «Шахтер» «Тобылды» 4:1 есебімен ұтты.
Сондай-ақ, кеше, 1 мамырда «Атырау» «Ордабасын» ұтса, «Астана» «Тұранмен» тең ойнады.
Дәл қазір «Ақсу» мен «Каспий», «Мақтаарал» мен «Тараз» командалары кездесуде.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.