НҰР-СҰЛТАН. ҚазАқпарат - Футболдан UEFA Еуропа лигасы 1/4 финалында Испанияның «Барселона» командасы 7 сәуірде Германияда «Айнтрахтпен» тең түсті, деп хабарлайды ҚазАқпарат тілшісі.
Кездесу барысында екі команданың белсенділігі байқалып тұрды. Десе де неміс футболшылары гол соғу мүмкіндігін көбірек іздеді. Нәтижесінде олардың қатарынан Ансгар Кнауфф 48-минутта алыстан шірене теуіп, командасын алға шығарды. Оған 66-минутта испаниялық Ферран Торрес бір голмен жауап қайырды.
Сондай-ақ, дәл осы күні «Брага» (Португалия) мен «Рейнджерс» (Шотландия) 1:0 есебімен жеңсе, «Вест Хэм Юнайтед» (Англия) мен «Лион» (Франция), «РБ Лейпциг» (Германия) мен «Аталанта» (Италия) командалары 1:1 есебіне қанағат білдірді.
Қарымта ойындар 14 cәуірде өткізіледі. Ал жартылай финал 28 сәуір мен 5 мамыр күндеріне белгіленген.
Финал 18 мамырда Испанияның Севилья қаласындағы «Рамон Санчес Писхуан» стадионында болады.
Еске салсақ, бұдан бұрын футболдан Чемпиондар лигасының 1/4 финалындағы алғашқы ойындар өткізілді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.