12:45, 13 Сәуір 2021

Футболдан Қазақстан біріншілігі: Бүгін бесінші тур ойындары басталады

НҰР-СҰЛТАН. ҚазАқпарат - Бүгін футболдан Премьер-лига командалары арасындағы ел біріншілігінің бесінші туры басталады, деп хабарлайды ҚазАқпарат тілшісі.

Ойындар 13 және 14 сәуір күндеріне белгіленген. Алғашқы күні екі ойын өткізілсе, одан кейін қалған бес кездесу жанкүйерлер назарына ұсынылады.

Аталған тур шымылдығы 13 сәуірде 14.00-де «Қызылжар» (Петропавл) мен «Ақтөбе» командалары арасындағы ойында түріледі. Одан кейін 16.00-де «Шахтер» (Қарағанды) және «Ақжайық» (Орал) командалары жасыл алаңға шығады.

Ал 14 сәуірдегі алғашқы кездесу 15.00-де «Ордабасы» (Шымкент) мен «Астана» (Нұр-Сұлтан) арасында болады. Келесі кезекте 16.00-де «Каспий» (Ақтау) мен «Қайрат» (Алматы), 17.00, 18:00 «Тобыл» (Қостанай) мен «Қайсар» (Қызылорда) клубтары өзара шеберлік байқасады. Сондай-ақ, 18.00-де «Атырау» мен «Жетісу» (Талдықорған) ойнаса, аталған турды 20.00-де «Тұран» (Түркістан) мен «Тараз» клубтары түйіндейді.

Естеріңізге сала кетелік, төртінші турдан кейін көш басында 10 ұпаймен Алматының «Қайрат» командасы келеді. Екінші және үшінші орындардағы «Астана» және «Тараз» командаларының еншісінде сегіз ұпайдан бар.

Спорт Қоғам

Әділжан Үмбет

1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді. 2015-2020 жылдарда «Ақмешіт апталығы» газетінің бас редакторы болды. Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті. 2018 жылдан бері «Kazinform» ақпарат агенттігінде Қызылорда облысындағы меншікті тілші.