НҰР-СҰЛТАН. ҚазАқпарат - Футболдан Премьер-лига командалары арасындағы Қазақстан біріншілігі төртінші турының алғашқы ойын күні аяқталды, деп хабарлайды ҚазАқпарат тілшісі.
Алғашқы екі турды сәтсіз өткізген елордалық «Астана» кейінгі ойындарда жинақы қимыл көрсетті. Қатарынан екі мәрте жеңіске жетті. Бүгін елорда клубы Түркістанда «Мақтарал» командасын 3:0 есебімен сүріндірді.
Өзге ойындарда өз алаңында «Каспий» «Ордабасыны», «Қызылжар» «Ақсуды» 2:1 жеңсе, «Тараз» «Атырауға» 0:1 есебімен жол берді. Ал «Ақтөбе» мен «Шахтер» 1:1 есебіне қанағат білдірді.
Енді 4 сәуірде тағы екі ойын өткізіледі. Алдымен, 16.00-де «Ақжайық» (Орал) мен «Қайрат» (Алматы) кездессе, 19.00-де «Тобыл» (Қостанай) мен «Тұран» (Түркістан) шеберлік байқасады.
Бүгінгі нәтиже бойынша 10 ұпаймен «Каспий» командасы көш басына шықты. Одан кейінгі орындарда үш ойыннан кейін 7 ұпаймен «Шахтер»,«Қайрат» және «Тобыл» командалары келеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.