НҰР-СҰЛТАН. ҚазАқпарат – Футболдан Қазақстан чемпионатының 18-турында Қарағандының «Шахтері» өз алаңында «Таразды» қабылдады, деп хабарлайды ҚазАқпарат тілшісі.
«Тараз» бен «Шахтер» сәйкесінше 25 және 24 ұпаймен турнир кестесінде 6-7-орында құйрық тістесіп келе жатқан еді.
Бірінші таймның 16-минутында «Шахтер» сапындағы босниялық Эдин Рустемовичтің бағыттаған добынан кейін «Тараздың» қорғаушысы Нұрлан Дайыров баспен өз қақпасына гол соғып алды.
Тараздықтардың есепті теңестіретіндей мүмкіндіктері болды. Болгариялық Милен Гамаковтың алыстан тепкен добы қақпа маңдайшасынан кері қайтты. Алайда, есеп екінші кезеңде де өзгерген жоқ.
Осылайша, 1:0 есебімен қарсыласын тізе бүктіріп, 27 ұпай жинаған қарағандылықтар турнир кестесінде төртінші сатыға көтерілді.
Бүгін ел біріншілігінде тағы да бірнеше ойын өтеді.
Еске сала кетейік, бұдан бұрын Қазақстан кубогінің жартылай финалына шыққан екінші команда анықталғанын жазған болатынбыз.
Сондай-ақ, «Тұран» футбол клубының бас бапкері қызметінен кетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).