АСТАНА. ҚазАқпарат - Бүгін футболдан Қазақстан кубогы жартылай финалында қостанайлық «Тобыл» «Атыраудан» басым түсті, деп хабарлайды ҚазАқпарат тілшісі.
Кездесу барысында алаң иелері алғашқы минуттан жеңіске жету жолын іздеді. Десе де оған атыраулық команда ойыншылары лайықты қарсылық көрсетті.
Ойынның екінші кезеңінде «Тобыл» басымдықты арттыра түсті. Нәтижесінде 83-минутта Асмир Сульич мергендік танытты. Бұл гол қостанайлық клубқа жеңіс алып келді.
Осылайша «Тобыл» қарсыласынан 1:0 есебімен басым түсті.
Айта кетсек, бұған дейін «Тобыл» Павлодар облысының «Ақсу», Қарағандының «Шахтер», «Атырау» командасы «Ақтөбе», Алматының «Қайрат» командаларының осал тұсын тапты.
Еске салсақ, бұдан бұрын жартылай финалдағы тағы бір кездесуде «Астана» елордада «Ордабасыны» 1:0 есебімен тізе бүктірді.
Енді қарымта ойын 8 шілдеге белгіленген.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.