Швейцарияның Ньон қаласында УЕФА Ұлттар лигасы плей-офф сатысының жеребесі тартылды. Онда Қазақстан құрамасының жартылай финал және финалдық ойындарын қай алаңда өткізетіні белгілі болды, деп хабарлайды Kazinform.
Қазақстан құрамасы С жолымен 2024 жылдың 21 наурызында жартылай финалда сырт алаңда Грекиямен кездеседі. Жеңген жағдайда 26 наурызда тағы да сырт алаңда Грузия-Люксембург жұбының жеңімпазымен шеберлік байқасады.
Төрт құраманың арасынан үздік шыққаны 2024 жылғы Еуропа чемпионаты финалдық сатысына жолдама алады.
Қазірге дейін құрлықтық додаға іріктеу сатысы арқылы жолдама алған 21 құрама белгілі болды. Бұл тізімде дүбірлі доданы өткізетін Германиядан өзге Португалия, Франция, Испания, Бельгия, Англия, Венгрия, Дания, Албания, Австрия, Турция, Румыния, Шотландия, Словения, Словакия, Чехия, Нидерланд, Хорватия, Сербия, Италия, Швейцария бар.
Еуропа чемпионатының іріктеу сатысында ел құрамасы Н тобында 18 ұпаймен Финляндиямен бірге үшінші-төртінші орынды өзара бөлісті.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.