Футболдан Қазақстан құрамасы UEFA аясында тарихи көрсеткішке қол жеткізді
Ел құрамасы бұған дейін Еуропа чемпионатының іріктеу сатысында мұндай ұпай иеленген емес. Атап айтқанда, 2008 жылы – 10, 2012 жылы – 4, 2016 жылы – 5, 2020 жылы – 10 ұпай жинаған еді.
Ал Еуропа құрлығы бойынша әлем чемпионаты іріктеу сатысында 2006 жылы – 1, 2010 жылы – 6, 2014 жылы – 5, 2018 жылы – 3, 2022 жылы – 3 ұпайды місе тұтты.
Алда үш ойын бар. Бұл көрсеткіш әлі де жақсара түседі деген үміттеміз.
Еске салсақ, ел құрамасы бүгін, 10 қыркүйекте «Астана-Аренада» 2024 жылғы Еуропа чемпионатына іріктеудің 6-турында Солтүстік Ирландияны 1:0 есебімен жеңді. Кездесу барысында 27-минутта қазақстандық шабуылшы Максим Самородов мергендігімен көзге түсті. Бұл гол Қазақстан құрамасына төртінші мәрте жеңіс алып келді. Матчты трибунадан Президент Қасым-Жомарт Тоқаев тамашалады. Ойыннан кейін Мемлекет басшысы спортшыларымызбен кездесіп, жеңіспен құттықтады.
Бұған дейін ел құрамасы бес кездесу өткізген еді. Алдымен Словениядан 1:2 есебімен жеңілсе, Данияны – 3:2, Сан-Мариноны – 3:0, Солтүстік Ирландияны – 1:0 есебімен қапы қалдырды.
Қазақстан құрамасына 2022 жылдың 27 сәуірінен бастап ресейлік бапкер Магомед Адиев жетекшілік етіп келеді. Оның жетекшілігімен футболшылар 14 ойын өткізді. Қазірге дейін Ұлттық құрама 8 мәрте жеңіске жетіп, біреуінде тең нәтиже тіркелді, бесеуінде қарсыласына есе жіберді.
Осы уақыттағы турнир кестесіндегі көрсеткіш бойынша Қазақстан 2024 жылғы Еуропа чемпионатына іріктеу сатысында 6 ойыннан кейін 12 ұпаймен екінші орында тұр.
Айта кетейік, дәл қазір Қазақстан ойын көрсететін H тобында Финляндия мен Дания кездесуі өтіп жатыр. Әзірге есеп –0:0.
Ал сағат 00.45-те Словения мен Солтүстік Ирландия құрамалары жасыл алаңға шығады.
Енді Қазақстан құрамасы сырт алаңда 14 қазанда Даниямен, 17 қазанда Финляндиямен кездеседі.