НҰР-СҰЛТАН. ҚазАқпарат - Бүгін футболдан UEFA Конференция лигасында қазақстандық «Қайрат» сырт алаңда Кипрдің «Омония» командасымен кездесті, деп хабарлайды ҚазАқпарат тілшісі
«Қайрат» H тобында сынға түсті. Қарсыластары - Швейцарияның «Базель», Әзербайжанның «Карабах» және Кипрдің «Омония» командалары.
Бұған дейін алматылық клуб өз тобында бес ойын өткізді. Алғашқы турда «Омониямен» тең түсіп, қалғанында қарсыластарына есе жіберді.
Екі команда да жарысты жалғастыру мүмкіндігінен ертерек қол үзген еді.
Сондықтан қайсысы жеңіске жетсе де еурокубок ойындарын ертерек аяқтайтын.
Кездесу барысында командалар шабуылға көбірек көңіл бөлді. Дегенмен мүмкіндіктерін мүлт жіберіп жатты.
Бірінші кезеңнің соңына таман «Омония» қақпасына белгіленген пенальтиді Жоао Поало пайдалана алған жоқ.
Екінші кезеңде де командалар гол соғу мүмкіндігін қарастырды. Дегенмен таблодағы есеп өзгерген жоқ. Ойын 0:0 есебімен тең аяқталды.
Аталған топта «Базель» және «Карабах» жарыстың келесі сатысына жолдама алды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.