ОРАЛ. ҚазАқпарат - Португалия астанасы Лиссабонда өтіп жатқан шағын футболдан УЕФА кубогы үшін жарыста Алматының «Қайраты» финалға шықты.
Жартылай финалда бразилиялық маман Какау жаттықтыратын алматылықтар Мәскеудің «Динасын» 7:4 есебімен ұтты. Негізгі ойында қазақстандықтардан Лео көзге түсіп, үш доп соқты. Алайда мәскеуліктер соңғы, 40-минутта «Қайраттың» қақпасына екі гол енгізіп, есепті 3:3-ке жеткізді. Қосымша екі таймның басында Алешандре Диваней алматылықтарды алға шығарса, содан кейін Жуниор да Силва Дуглас пен Баптиста Лукаян мергендік танытты. Ойын нүктесін Лео қойып, төрт голдың авторы атанды.
«Қайрат» 26 сәуір күні өтетін финалда Испанияның «Барселона» немесе Португалияның «Спортинг» командаларының біреуімен ойнайды.
Айта кетейік, соңғы жылдары үздік клубтардың қатарынан табылып жүрген Алматының «Қайраты» бұдан екі жыл бұрын УЕФА кубогын ұтып алған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).