Футзалдан Чемпиондар лигасы: «Семей» мен «Қайрат» алғашқы ойындарын өткізеді

АСТАНА. KAZINFORM - Бүгін футзалдан УЕФА Чемпиондар лигасы негізгі кезеңінде Абай облысының «Семей» және алматылық «Қайрат» алғашқы ойындарын өткізеді.

Қазақстандық клубтар төртінші топта сынға түседі. Қарсыластары - Португалияның «Спортинг Лиссабон», Венгрияның «Халадаш» клубтары. 

Бүгін ел чемпионы «Семей» 17:00-де «Спортинг Лиссабон» клубымен шеберлік байқасса, «Қайрат» 20:00-де «Халадашпен» ойнайды.

Ал 23 қазанда 20:00-де «Қайрат» пен «Семей» өзара кездессе, тағы бір кездесуде «Спортинг Лиссабон» мен «Халадаш» ойнайды. 

Сондай-ақ 25 қазанда 17:00-де «Семей» мен «Халадаш», 20:00-де «Қайрат» пен «Спортинг Лиссабон» кездеседі. 

Қазақстандық клубтардың қатысуымен өткен ойындардың барлығы «Qazsport» телеарнасынан тікелей эфирде көрсетіледі.

Айта кетсек, аталған турнирге семейлік клуб алғаш рет қатысып жатса, алматылық команда бұған дейін 20 мәрте бақ сынап үлгерді. Бұл Еуропа құрлығындағы командалар арасында абсолютті рекордты тіркеді.

«Қайрат» 2012/13, 2014/15 жылғы маусымда Чемпиондар лигасында жеңіс тұғырына көтерілген.
Ойындар Алматы қаласындағы Балуан Шолақ спорт сарайында өтеді.

Еске салсақ, бұдан бұрын «Қайрат» футзалдан 2024 жылғы Қазақстан суперкубогының иегері атанды.