АСТАНА. KAZINFORM — Футзалдан Қазақстан біріншілігінің V туры мәресіне жетті. Көш басында келе жатқан «Семей» бұл турда да жеңісті жолын жалғастырып, өз алаңында «Қарағанды» командасын 7:0 есебімен жеңді. Олар 4 қазанда аталған қарсыласын 3:1 есебімен сүріндірген еді.
Семейлік клуб биылғы біріншілікті сәтті бастады. Қазірге дейін алты турда бірде-бір мәрте жеңілістің ащы дәмін татқан жоқ. Турнир кестесінде 18 ұпаймен «Ақтөбемен» бірге бірінші және екінші орынды өзара бөлісіп тұр.
Ал алматылық «Қайрат» сырт алаңда «Атырауды» 7:2, есебімен жеңсе, бір күн бұрын 2:2 есебімен тең түскен еді.
Сондай-ақ аталған турда қарағандылық «Тұлпар» «Шымкентті» 7:3, 6:1, «Ақтөбе» ақтаулық «Каспийді» 6:1, 5:3 есебімен тізе бүктірді.
Ал Қостанай облысының «Аяты» елордалық «Астанамен» 2:2 есебімен тең ойнап, тағы бір ойында 4:2 есебімен басым түсті.
Сондай-ақ талдықорғандық «Жетісу» Оралдың «Байтерек» клубын 3:1 есебімен жеңіп, тағы бір кездесуде 0:9 есебімен есе жіберді.
Айта кетсек, футзалдан ел біріншілігінде биыл 12 команда бақ сынап жатыр.
Енді алдағы тур ойындары 10-11 қазан күндері өткізіледі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.