00:24, 30 Қаңтар 2022

Футзалдан Еуропа чемпионаты: Ширек финалға шыққан барлық құрама анықталды

НҰР-СҰЛТАН. ҚазАқпарат - Футзалдан Еуропа чемпионатының ширек финалына шыққан барлық құрама анықталды, деп хабарлайды ҚазАқпарат тілшісі.

Бүгін С және D топтарында ойындар өткізілді.

С тобында Ресей Польшаны 5:1, Словакия Хорватияны 5:3 есебімен тізе бүктірді. Нәтижесінде аталған топтан Ресей 9, Словакия 4 ұпаймен жарысты жалғастыруға мүмкіндік алды.

D тобында Әзербайжан Босния және Герцоговинаны 4:2, Испания Грузияны 7:0 есебімен жеңді. Бұл топта Испания 7, Грузия 6 ұпаймен ширек финалға шықты.

Ал 28 қаңтарда А және В топтарында Қазақстан мен Финляндия, Португалия мен Украина жарыстың аталған сатысына жолдама алды.

Ширек финалда құрамалар төмендегіше жұп құрады:

31 қаңтар

Португалия мен Финляндия

Қазақстан мен Украина

1 ақпан

Испания мен Словакия

Ресей мен Грузия

Жартылай финал ойындары 4 ақпанға белгіленген. Ал 6 ақпанда финал мен 3-орын үшін ойындар болады.

Еуропа чемпионаты 1996 жылдан бері тұрақты түрде өткізіліп келеді. Бүгінге дейін Испания - 7, Италия - 2, Ресей мен Португалия 1 мәрте чемпион атанды.


Спорт
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді. 2015-2020 жылдарда «Ақмешіт апталығы» газетінің бас редакторы болды. Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті. 2018 жылдан бері «Kazinform» ақпарат агенттігінде Қызылорда облысындағы меншікті тілші.