АСТАНА. KAZINFORM - Футзалдан Қазақстан чемпионатының финалдық плей-офф сериясының алғашқы ойынында «Семей» командасы «Қайраттан» басым түсті.
Бірінші кездесу тағдырын жалғыз гол шешті. Осылайша семейлік клуб қарсыласын 1:0 есебімен жеңіп, плей-офф сериясында басымдығын арттырды.
Енді тағы бір ойын 24 маусымда Семей қаласында өткізілсе, үшінші кездесу 28 маусымда Алматыға белгіленген. Қажет болған жағдайда 29 маусым Алматыда тағы бір ойын өтсе, бесінші кездесу 5 шілдеде Семейде болуы мүмкін.
Финалда жеңімпаз үш жеңіс бойынша анықталады.
Футзалдан ел біріншілігі 1998 жылдан бері тұрақты түрде өткізіліп келеді. Қазірге дейін алматылық «Қайрат» 20 мәрте жеңіс тұғырына көтерілді.
Айта кетсек, алматылық ұжым 2004 жылдан бері бас жүлдені ешкімге ұстатпай келе жатқан еді. Былтыр алғаш рет күміс жүлдені қанағат тұтуға мәжбүр болды.
2024 жылы алғаш рет «Семей» командасы чемпиондық атақты жеңіп алды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.