НҰР-СҰЛТАН. ҚазАқпарат - Бүгін елордада футзалдан Қазақстан Кубогы финалында ойнайтын екі команда анықталды, деп хабарлайды ҚазАқпарат тілшісі.
Аталған турнир елордадағы «Сайран-арена» спорт кешенінде өтіп жатыр. Онда барлығы 8 команда бақ сынаған болатын. Командалар екі топта сынға түсті.
А тобында «Жетісу» (Талдықорған), «Бәйтерек» (Орал), «Аят» (Рудный), «Оқжетпес» (Көкшетау) командалары шеберлік байқасты. Ойындар 5-8 қазан аралығында өтті. Олардың арасынан «Жетісу» мен «Аят» жартылай финалға жолдама алды.
Ал В тобында «Қайрат» (Алматы), «Ақтөбе», «Атырау» және «Каспий» (Ақтау) клубтары сынға түсті. Бұл төрттіктен «Қайрат» пен «Ақтөбе» жартылай финалға шықты.
Жартылай финалда ақтөбелік футзалшылар «Аятты» 3:1, «Қайрат» «Жетісуды» 2:0 есебімен жеңді.
Енді финалда «Қайрат» және «Ақтөбе» командалары кездеседі. Ойын «Qazsport» телеарнасынан елорда уақытымен 11.55-те тікелей эфирде көрсетіледі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.