НҰР-СҰЛТАН. ҚазАқпарат - Футзалдан Қазақстан құрамасы қыркүйек айында Әзербайжанмен екі мәрте жолдастық кездесу өткізеді, деп хабарлайды ҚазАқпарат тілшісі.
Ойындар 19-20 қыркүйек күндеріне жоспарланған. Екі кездесу де Ақтау қаласындағы «Халық Арена» спорт кешенінде өтеді деп жоспарланған. Бұл футзалдан 2024 жылғы әлем чемпионатына іріктеуге дайындық есебінде ұйымдастырылып отыр.
Қазақстандық футзалшылар аталған турнирдің негізгі сатысындағы іріктеу кезеңінде бесінші топта сынға түседі. Қарсыластары - Словения және Черногория. Іріктеу кезеңі 2022 жылдың 8 қазанында басталып, 2023 жылдың 8 наурызында аяқталады.
Еске сала кетейік, негізгі сатысындағы іріктеу кезеңі 12 топтан тұрады. Әр топтың жеңімпаздары мен екінші орын алған төрт үздік команда тікелей элиталық кезеңге шығады.
Әлем чемпионаты 1989 жылдан бері тұрақты өткізіліп келеді. Қазақстан құрамасы аталған додада үш мәрте бақ сынады. 2021 жылы төртінші орынға тұрақтады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.