АСТАНА. KAZINFORM – Футзалдан қазақстандық төреші Нұрлыбек Қалимағанбетов Чемпиондар лигасында қызмет атқарады. Ақтаулық төреші Нұрлыбек Қалимағанбетов UEFA тарапынан Чемпиондар лигасының іріктеу кезеңіндегі ойындарына төрешілік етуге шақырту алды.
Биыл 38 жастағы арбитр алғаш рет халықаралық дәрежедегі төреші болды. Енді оған алдағы уақытта халықаралық ойындарда қызмет атқаруға мүмкіндік туды.
Нұрлыбек Қалимағанбетов 21-24 тамыз аралығында Молдова астанасы Кишиневте өтетін G тобының матчтарында қызмет атқарады. Бұл топта «Широки Бриег» (Босния және Герцеговина), «Маккаби» (Нетания, Израиль), «Джорджианс» (Грузия) және «Клик» (Молдова) ойындары болады.
Сондай-ақ футзалдан Қазақстан құрамасы Тәжікстанмен 22 және 24 тамыз күндері екі жолдастық кездесу өткізеді.
Одан кейін Қазақстан құрамасының Иранға қарсы екі жолдастық матчы жоспарланған. Ойындар 30 тамыз және 1 қыркүйекке белгіленген.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.