G7 Иранды МАГАТЭ-мен ынтымақтасуға шақырды

АСТАНА. KAZINFORM – «Үлкен жетілік» (G7) елдерінің сыртқы істер министрлері Иранды ядролық бағдарламасына қатысты Халықаралық атом энергиясы агенттігімен (МАГАТЭ) ынтымақтастықты қайта бастауға шақырды, деп хабарлайды Анадолы.

— Біз Иранның ядролық бағдарламасына қатысты жан-жақты, тексеруге болатын және тұрақты келісімге әкелетін келіссөздерді қайта жандандыруды қолдаймыз, — делінген дипломатиялық ведомство басшыларының бірлескен мәлімдемесінде.

Министрлер барлық тарапты «аймақтың тұрақсыздануын ушықтыруы мүмкін әрекеттерден аулақ болуға» шақырды.

Сондай-ақ Иранның Ядролық қаруды таратпау туралы шартқа қатысушы ел ретінде қалуы тиіс екені атап өтілді.

G7 елдерінің сыртқы істер министрлері Израиль қауіпсіздігін қолдайтындарын растады.

— Біз Таяу Шығыста бейбітшілік пен тұрақтылықты сақтауға берілгендігімізді растаймыз, — делінген мәлімдемеде.

Айта кетелік Иран Сыртқы істер министрлігінің ресми өкілі Исмаил Бағаи Израиль мен АҚШ-тың шабуылдарынан кейін Иранның Халықаралық атом энергиясы агенттігімен (МАГАТЭ) ынтымақтастығы бұрынғыдай жалғаса алмайтынын мәлімдеген еді.