Ғалымдар атмосфералық ауадан су өндіретін жаңа құрылғы жасап шығарды

АСТАНА. KAZINFORM — АҚШ-тағы Массачусетс технологиялық институтының инженерлері қауіпсіз әрі арзан ауыз суға қолжетімділікті арттыру мақсатында  ауаны пайдаланып отыр.

AZƏRTAC агенттігінің хабарлауынша, Жер атмосферасында бу күйінде миллиардтаған галлон су бар. Егер осы буды тиімді түрде ұстап, конденсациялауға мүмкіндік туса, ол дәстүрлі су көздері қолжетімсіз аймақтарды таза ауыз сумен қамтамасыз ете алады.

Осы мақсатта Массачусетс технологиялық институтының командасы атмосфералық суды жинауға арналған жаңа құрылғы ойлап тауып, оны сынақтан өткізді. Нәтижесінде бұл құрылғы су буын тиімді ұстап, тіпті шөлдегі құрғақ ауа жағдайында да қауіпсіз ауыз су өндіре алатыны дәлелденді.

Құрылғы — терезе көлеміндей қара түсті тік панель. Ол су сіңіргіш гидрогель материалынан жасалып, салқындатқыш қабатпен қапталған шыны камераға орналастырылған. Гидрогель — қара түсті көпіршікті пленка тәріздес, оның бетінде бу сіңірген кезде ісінетін күмбез тәрізді құрылымдар бар. Бу буланған кезде бұл күмбездер жиырылып, оригами секілді пішінге енеді. Бу шыны бетіне конденсацияланып, ағып, арнайы түтік арқылы ішуге жарамды таза су ретінде жиналады.

Құрылғының ерекшелігі — ол толықтай автономды, яғни жұмыс істеуі үшін батарея, күн панельдері немесе электр желісі қажет емес. Команда бұл құрылғымен АҚШ-тағы Солтүстік Американың ең құрғақ өңірі саналатын Калифорниядағы Өлім аңғарында бір аптадан аса уақыт жұмыс жүргізген. Тіпті өте төмен ылғалдылық жағдайында құрылғы тәулігіне шамамен 160 миллилитр (шамамен екі үшінші кеседей) ауыз су өндіре алған.

Инженерлердің бағалауынша, бірнеше тік панельді шағын массив түрінде орнату арқылы тіпті шөлейт аймақтарда да үй шаруашылықтарын ауыз сумен пассивті түрде қамтамасыз етуге болады. Ал ауа ылғалдылығы артқан сайын құрылғының өнімділігі де артады, бұл оны қоңыржай және тропиктік климаттағы үйлер үшін де тиімді етеді. 

Айта кетелік 27 жастағы қазақстандық ғалым жаңа өлшеу құрылғысын ойлап тапқан еді.