Ғалымдар агроөнеркәсіп кешенін субсидиялаудың жаңа әдісін ұсынып отыр

АСТАНА. ҚазАқпарат - Бүгінде егістік алқаптарының өнімділігі төмендеп барады. Себебі жердің құнарлылығы азайды. Осыған байланысты топыраққа тыңайтқыштарды дәлдеп себудің технологиясын тездетіп қолға алу қажет. Ол үшін қазіргі комбайндарға қосымша опцияларды орнатса да жеткілікті, деп хабарлайды ҚазАқпарат тілшісі.

Сәкен Сейфуллин атындағы Агротехникалық университеттің ғалымдары егістік алқаптарының агрохимиялық картограммасын жасап, топырақтың құнарлылығына қатысты көптеген мәселелерді анықтады. Мұндай бастама алғаш рет қолға алынып отыр. Ғалымдар әрбір гектар жердің құрамын зерттеп шықты. Зерттеуге сәйкес, ең үздік деген шаруа қожалықтарына тиесілі жерлердің өзі құнарсыз, уақыт өткен сайын тозып барады. Соның салдарынан астықтың түсімі де аз, сапасы да төмен. «Бұрын Қазақстанда 35 млн гектар егістік алқаптары болды. Қазір біз оны 24-25 млн-ға дейін қысқартып, егін шаруашылығын тиімді басқаруға көштік. Құнарсыз және жарамсыз жерлерді шығарып тастадық Ол да дұрыс. Дегенмен, астық алқаптарының өнімділігі көп көтерілген жоқ. Неге? Себебі біз тыңайтқыштарды себуді қойдық», - дейді университет басшысы Ақылбек Күрішбаев.

Оның айтуынша, бүгінде тыңайтқыштарды дәлдеп себудің арқасында астық алқаптарының өнімділігін екі есеге арттыруға болады. Ал жаңа технологияларды қазіргі техникаға орнатса да жеткілікті.  «Ашығын айту керек, жаңа технологиялармен жабдықталған техниканың бағасы арзан емес. Дегенмен, ол құрал-жабдықтарды Ресей, Беларусь пен АҚШ техникасына орнатуға болады. Онымен арнайы компаниялар айналысады. Мәселен, қазіргі комбайнға қосымша опциялар орнатуға мүмкіндік бар. Соның арқасында техниканың дәлдігі артады. Алайда бір мәселе бар. Бүгінде мемлекет тарапынан жалпы техниканы сатып алуға субсидия беріледі. Ал қосымша құрал-жабдықтарды орнатуға субсидия жоқ. Осыған байланысты ауыл шаруашылығы министрлігі субсидияның жаңа түрін қолға алуы қажет деп ойлаймыз. Сонда фермерлер тұтас бір техниканы алмай, қолда бар техниканы жетілдіре алады. Сөйтіп, біраз ақшаны да үнемдеуге болады», - деп атап көрсетті А.Күрішбаев.

Айта кетейік, бүгін Сәкен Сейфуллин атындағы Агротехникалық университетінде Қазақстан - Германия форумы өтті. Негізгі тақырып - «Ауыл шаруашылығы саласындағы цифрландыру». Аталған форум алғаш рет ұйымдастырылып отыр. Ал оған жиналған ғалымдар агроөнеркәсіп саласына жаңа технологияларды енгізу мәселесін кеңінен талқылап, Германияның тәжірибесін зерделеп шықты.