Ғалымдар ұйықтар алдында смартфон пайдалану зиянды екенін анықтады

АСТАНА. ҚазАқпарат - АҚШ-тың Калифорния мен Сан-Франциско университеттерінің ғалымдары смартфонды көп пайдалану мен ұйқының бұзылуы арасында байланыс бар екендігін анықтады. Зерттеу авторлары ұйықтар алдында смартфон пайдалану ұйқының қанбауына және оның ұзақтығына әсер етеді деп мәлімдеді. Бұл туралы The Guardian басылымы жазады.

Зерттеуге 18 жастан асқан 653 америкалық қатысқан. Олардың смартфондарына 30 күн ішінде экранның қосылып тұрғанын тіркеп отыратын қолданба орнатылған. Ал ұйқының сапасы жөніндегі деректер зерттеуге қатысушылар арасында сауалнама бойынша жинақталған. Эксперимент нәтижесі әр респонденттің тәулігіне 1 сағат 29 минут смартфон пайдаланатынын көрсеткен (әр сағатта үзіліссіз 3,7 минут). Ұйықтар алдында смартфон экранына көбірек үңілгендердің бәрі ұйқысының бұзылғанын, басқаларға қарағанда жатқан соң ұзақ уақыт көз іле алмағанын мәлімдеген.

«Біз осы арқылы байланыстың нақты себептерін дәлелдей алмасақ та, осы деректер көмегімен ұялы телефонға неғұрлым көбірек үңілсеңіз соғұрлым ұйқыңыз нашарлай түсетініне көз жеткіздік», - деді зерттеудің тең авторы Грегори Маркус.

Жатар алдында смартфонға арналған әрбір минут ұйқының ұзақтығын 5 минутқа азайтатыны белгілі болды.