НҰР-СҰЛТАН. ҚазАқпарат - Алматы қаласында өтіп жатқан гандболдан жасөспірім қыздар арасында Азия чемпионатында Қазақстан құрамасы Үндістанға есе жіберді, деп хабарлайды ҚазАқпарат тілшісі.
Құрлықтық додаға барлығы бес команда қатысуда. Олардың қатарында Қазақстаннан өзге Үндістан, Иран, Өзбекстан және Таиланд құрамалары бар.
Бұған дейін Қазақстан қыздары Таиланд (28:20) және Иран (30:24) құрамаларын тізе бүктірді. Бүгін Үндістанға 21:29 есебімен жол беріп қойды.
Турнир кестесінде үш ойыннан кейін Үндістан, Иран және Қазақстан қоржынында төрт ұпайдан бар. Ал олардан бір ойын кем өткізген Өзбекстанда екі ұпай болса, үш кездесуде қарсыластарына есе жіберген Таиланд бірде-бір ұпайға қол жеткізген жоқ.
Қазақстан қыздары бұған дейін бір мәрте күміс (2007 жыл), үш мәрте қола (1998, 2011, 2015 жыл) жүлдегер атанды.
Құрлықтық додада жеңімпаз атанған құрама әлем чемпионатына жолдама алады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.