Газадан 400 мыңға жуық адам эвакуацияланды — ЦАХАЛ екінші бағытты ашты
АСТАНА. KAZINFORM — Тұрғындардың анклавтың солтүстігінен жаппай көшуі гуманитарлық дағдарыстың ауқымын тағы бір мәрте көрсетті, деп хабарлайды Kazinform меншікті тілшісі.
Израильдің қорғаныс күштері (ЦАХАЛ) ХАМАС-қа қарсы кең ауқымды операцияға дайындық кезінде Газа қаласынан шамамен 400 мың палестиналық кеткенін мәлімдеді, деп хабарлайды израильдік БАҚ. Ағымдағы операциялардың басталуына дейін қала тұрғындарының саны 1 млн-ға жуық адам деп бағаланған.
Израиль әскері бұған дейін газалықтарға дереу аймақтың оңтүстік бөлігіндегі белгіленген гуманитарлық аймаққа көшуді бұйырған болатын. Соңғы күндері эвакуация қарқыны күніне ондаған мың адамға жетті.
Ар-Рашид тасжолындағы кептелістерге байланысты ЦАХАЛ Салах ад-Дин тасжолы бойындағы екінші эвакуация бағытын жариялады, ол жақын күндері ашылады. Осы уақытқа дейін жолақтың оңтүстік аудандарына шығу тек жағалаудағы жол арқылы ғана мүмкін болды.
Израиль премьер-министрі Биньямин Нетаньяху Тель-Авивте әскери қолбасшылар алдында сөйлеген сөзінде Израиль армиясының басым бағыттарының бірі — қаланың барлық бейбіт тұрғындарын эвакуациялау екенін мәлімдеді.
Израиль тарапы Газа қаласындағы операциялардың кеңейтілетінін алға тартып отыр. ЦАХАЛ бригадалық генералы Эффи Дефриннің мәлімдеуінше, қала «ХАМАС-тың әскери және әкімшілік билігінің орталығына және тарихтағы ең үлкен тірі қалқанға» айналған.
Израиль армиясының ресми хабарламаларында құрлықтағы науқанның мақсаты — қол жеткізілген нәтижелерді нығайту және соғыс мақсаттарына жету екені атап өтілді.
Осы арада Палестина ақпарат құралдары түнде анклавтың әртүрлі аудандарында, соның ішінде Тель-әл-Хавада және қаланың оңтүстігінде мина қойылған көліктердің атқылағанын хабарлады.
Анклав денсаулық сақтау органдарының мәліметінше, сәрсенбі күні таңертеңнен бері кем дегенде 12 адам, оның ішінде бір әйел мен бір бала қаза тапты. Бұдан басқа, қалада кем дегенде 17 тұрғын үй қираған.
Израиль әскері авиацияның бір түнде 50-ге жуық нысанаға соққы бергенін хабарлады, олардың көпшілігі Газа қаласында.
Армия мәліметінше, соңғы тәулік ішінде ХАМАС пайдаланатын тоннельдер, ғимараттар, содырлар топтары және басқа да инфрақұрылымдарды қоса алғанда, 140-қа жуық нысанға соққы жасалған. Барлығы 48 сағат ішінде 150-ден астам нысанаға соққы берілді.
Бұдан бұрын Қытай Израильден Газадағы әскери операцияны дереу тоқтатуды талап еткені хабарланды.