Германия сириялықтарға көмек ретінде 300 миллион еуро бөлуді уәде етті
АСТАНА. KAZINFORM — Германия БҰҰ және басқа да бірқатар ұйым арқылы сириялықтарға көмек ретінде тағы 300 миллион еуро бөлуді уәде етті. Бұл туралы Германияның сыртқы істер министрі Анналена Бербок дүйсенбі күні Брюссельде ЕО басшылығымен өтетін донорлық конференция қарсаңында мәлімдеді, деп хабарлайды Kazinform агенттігінің тілшісі.
Reuters агенттігінің мәліметінше, бөлінген қаражаттың жартысынан астамы Сирия халқын қолдауға бағытталады, алайда оларды бөлу елдің өтпелі үкіметінің қатысуынсыз жүзеге асырылатынын Бербок атап өтті.
Германия Сыртқы істер министрлігінің мәлімдемесіне сәйкес, бұл қаражат азық-түлікпен қамтамасыз етуге, медициналық қызметтер көрсетуге, шұғыл баспана ұсынуға, сондай-ақ халықтың ең осал топтарын қорғау шараларына жұмсалады.
Сондай-ақ, көмек Иордания, Ливан, Ирак және Түркияда тұратын сириялық босқындар мен оларды қабылдаушы қауымдастықтарға көрсетілетінін Бербок қоса айтты.
Ол тағы да Сирияның бейбіт болашағын қамтамасыз ету үшін инклюзивті саяси үдерістің маңыздылығын атап өтті.
— Еуропалықтар ретінде біз Сирия халқын қорғауда біргеміз, еркін және бейбіт Сирия үшін күресеміз, — деп мәлімдеді министр.
Сондай-ақ, ол өтпелі үкіметті алавит ауылдарында жүздеген бейбіт тұрғынның өлтірілуін тергеуге және кінәлілерді жауапқа тартуға шақырды.
Еске сала кетсек, 6-9 наурыз аралығында Сирияның жағалауындағы Тартус және Латакия провинцияларында биліктен тайдырылған президент Башар Асадтың жақтастары мен елдің жаңа билігі арасында қақтығыстар болды. Оған Асад жақтастарының Сирияның қоғамдық қауіпсіздік күштеріне шабуыл жасауы себеп болған. Мониторингтік топтардың бірінің мәліметінше, зорлық-зомбылық толқыны салдарынан 1000-нан астам адам қаза тапқан.
Бұл шабуыл биліктен тайдырылған президент Башар Асад тиесілі болған алавит қауымдастығының өкілдерін өлтіруге әкелді. Алавиттер — дәстүрлі түрде Сирияның жағалау аймақтарында қоныстанған және елдің билеуші элитасында маңызды орын алған діни азшылық тобы.
Өткен аптада Сирия басшысы бес жылға арналған уақытша конституцияға қол қойды. Ол өтпелі кезеңде барлық сириялықтардың құқықтарын қорғауға уәде береді.