Германия ЖИИ-ді дамытуда серпіліс жасауды жоспарлап отыр

АСТАНА. KAZINFORM — Германия 2030 жылға қарай жасанды интеллект ел экономикасының шамамен 10 пайыз табысын қамтамасыз етеді деген мақсат қойып отыр, деп хабарлайды Kazinform агенттігінің меншікті тілшісі.

Неміс экономистері елдегі еңбек өнімділігін арттыру үшін жасанды интеллектіні жедел енгізуге шақыруда. Осы мақсатта Германия 2027 жылға дейін Еуропалық Одақтың қаржыландыруымен жасанды интеллекттің гигафабрикаларын салуды көздеп отыр.

Еуропалық комиссия жасанды интеллектке арналған «гигафабрикаларды» салуға 20 миллиард еуро көлемінде ЕО қаржы бөлді.

Еуроодақ қазіргі кезде әлемде жасанды интеллектіні дамыту бойынша бәсекелестік күшейіп келе жатқанын атап өтті. Бұл бағытта Қытай, АҚШ және Үндістан көш бастап тұр. Германия мен ЕО оларды қуып жетуге талпынып жатыр.

— Жасанды интеллектіні енгізу арқылы біз 2030 жылға қарай экономикалық өндірісіміздің 10 пайызын осы технология негізінде қамтамасыз етуді және жасанды интеллектіні негізгі зерттеу салаларындағы маңызды құралға айналдыруды қалаймыз, — делінген Германияның Зерттеулер министрлігінің стратегия жобасында, оны Reuters агенттігі таныстырды.

Жобада Еуроодақ аумағында жоғары өнімді деректерді өңдеу орталықтарын салуға өтінімдер беріліп, олардың 2027 жылға қарай пайдалануға берілуі жоспарланған. Германияның федералдық үкіметі осы өтінімдерді өнеркәсіп өкілдерімен, сарапшылармен және федералдық жерлермен бірлесіп, жыл соңына дейін үйлестірмек.

Жыл басында қабылданған коалициялық келісімге сәйкес, Германия үкіметі кемінде бір осындай орталықты ел аумағында салуға ниетті.

Неміс стратегиясы сондай-ақ кванттық есептеулер саласындағы батыл мақсаттарды да қамтиды: 2030 жылға дейін екі бірдей «қателіктерді түзетуге қабілетті кванттық компьютер» жасалып, пайдаланушыларға қолжетімді болуы керек, делінген құжатта.

Үкімет бұл стратегияны осы айдың соңына дейін бекітуді жоспарлап отыр. Бұл құжат АҚШ пен Қытайды жасанды интеллект саласында қуып жету үшін батыл мақсаттар белгілейді.

Сондай-ақ биыл Германияда кванттық байланысқа арналған алғашқы зерттеу спутнигін ұшыру жоспарланған.

— Бұл бәсекелік артықшылықтармен қатар, тәуелділік те тудырады, — делінген құжатта. 

Сонымен қатар Германиядағы жасанды интеллект зерттеулері робототехника, машина жасау, автомобиль өндірісі және химия өнеркәсібі сияқты салалармен тығыз байланысты болуы тиіс екені атап өтілген.

Пентагонның да жасанды интеллектіні дамытуға 200 миллион доллар бөлгені туралы осы жерден оқи аласыз.