Ресми статистикаға сәйкес, биыл қазан айында елде баспана беру туралы 5 707 бастапқы өтініш пен халықаралық қорғау рәсімі аясындағы жаңа келу жағдайы тіркелген. Бұл 2025 жылдың қазан айымен салыстырғанда 40%-ға, ал 2024 жылдың сәйкес кезеңімен салыстырғанда 70%-ға аз.
Мұндай төмен көрсеткіш соңғы рет 2011 жылдың қазан айында тіркелген.
Германияның Ішкі істер министрі Александер Добриндт Bild басылымына берген түсініктемесінде бұл жағдайды заңсыз көші-қонға қарсы күрестегі бетбұрыс кезеңі деп бағалады.
– Қазан айында Германияда баспана беру туралы 5 707 бастапқы өтініш пен халықаралық қорғау рәсімі аясындағы жаңа келу жағдайы тіркелді. Бұл 2025 жылдың қазан айымен салыстырғанда 40%-ға, ал 2024 жылмен салыстырғанда 70%-ға аз. Мұндай төмен көрсеткіш соңғы рет 2011 жылдың қазан айында тіркелген, – деп жазады басылым.
Фридрих Мерц Германия канцлері қызметіне кіріскеннен кейін ел үкіметі көші-қон саясатын қатаңдатуға кірісті.
Ішкі істер министрлігі шекаралық бақылауды күшейтіп, бірқатар мигрантты ел аумағына кіргізуден бас тарта бастады.
2025 жылдың мамыр айынан бері Германия шекарасынан 47 551 адам кері қайтарылған. Бұдан бөлек, елге қайта кіруге тыйым салынған 2 432 адам шекарадан өткізілмеген.
Сонымен қатар Германияда ел аумағында заңды түрде тұруға құқығы жоқ адамдарды депортациялау рәсімін жеңілдететін заң күшіне енді.
Айта кетейік, бұған дейін Германияда саяси баспана сұрап алғаш рет өтініш бергендер саны 2012 жылдан бергі ең төменгі деңгейге түскені хабарланған еді. 2026 жылғы 25 қыркүйектегі жағдай бойынша 3 345 бастапқы өтініш тіркеліп, бұл көрсеткіш былтырғы сәйкес кезеңмен салыстырғанда 65%-ға азайған.