АСТАНА. KAZINFORM — Қырғызстан астанасы Бішкек қаласында грек-рим күресінен Азия чемпионаты қорытындыланды.
Сары құрлық додасында ерлеген, әсіресе, Алматбек Аманбек болды. Ол 72 келіге дейінгі салмақта ирандық Мохаммад Джавад Саадат Резаидің жауырынын жер иіскетті.
Резаи биыл Тиранада (Албания) Мұхамет Малоны еске алуға арналған халықаралық турнирде топ жарған еді. Алматбек онда бесінші орынды місе тұтқан болатын. Қазақстандық балуан сонда кеткен есені Бішкекте қайтарды.
Қазақстан құрамасынан сондай-ақ Нұрсұлтан Тұрсынов, Ибрагим Магомадов және Ислам Евлоев қола жүлдеге ие болды.
Осылайша, грек-рим күресі шеберлері Азия чемпионатын 1 алтын, 3 қола жүлдемен тәмамдады.
Жалпыкомандалық есепте Қырғызстан құрамасы көш бастады. Қырғызстандық төрт бірдей балуан Азия чемпионы атанды.
Қазақстан Иран мен Өзбекстаннан кейін төртінші орынға тұрақтады.
Еске сала кетейік, бұдан бұрын қазақстандық балуанның Азия чемпионатының финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).