23:00, 10 Сәуір 2023

Грек-рим күресі: Азия чемпионы Ибрагим Магомадов жеңісі жөнінде пікір білдірді

АСТАНА. ҚазАқпарат - Астана қаласында өтіп жатқан грек-рим күресінен ересектер арасында Азия чемпионатында «алтын» алған қазақстанды Ибрагим Магомадов жүлдесі жөнінде пікір білдірді, деп хабарлайды ҚазАқпарат тілшісі.

Фото: sports.kz

Ибрагим Магомадов (72 келі) ирандық Саяд Әли Именталабфоманимен шеберлік байқасты. Ол қарсыласынан 5:2 есебімен басым түсті.

«Туған елімде чемпион атанғаныма қуаныштымын. Белдесу алдында қарсыласым жайында мәлімет жинадым. Мықты және әлсіз тұстарын зерттедім. Финалға дайын болып келдім. Жеңіске жеткеніме қуаныштымын. Өз жеңісімді барлық қазақстандықтарға, жанкүйерлерге арнаймын. Өзіме қолдау білдірген отбасыма да ризашылығымыз шексіз. Енді алда әлем чемпионаты күтіп тұр. Соған дайындаламын», - деді Ибрагим Магомадов.

Ибрагим Магомадов 1991 жылы дүниеге келген. Қазірге дейін 2020 жылы Азия чемпионатында қола алған еді.

Грек-рим күресінен әлем чемпионатында ел құрамасынан Диас Қален (82 келі), Нұрсұлтан Тұрсынов (87 келі) күміс жүлдегер болса, Аманғали Бекболатов (55 келі) пен Мұхамедалі Мамырбек (63 келі), Алмат Кебіспаев (67 келі), Олжас Сырлыбай (97 келі), Әлімхан Сыздықов (130 келі) қола жүлде алды.

Спорт Қоғам

Әділжан Үмбет

1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді. 2015-2020 жылдарда «Ақмешіт апталығы» газетінің бас редакторы болды. Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті. 2018 жылдан бері «Kazinform» ақпарат агенттігінде Қызылорда облысындағы меншікті тілші.